|
3 OL gull til USA, 1 til Brasil ------------------------------- Flogbóltur, kvinnur ------------------------------- Finalan Kvinnurnar úr Brasil vunnu
leygardagin OL gull tá tær í finaluni vunnu 3-1 á USA. Settini endaðu
25-15, 18-25, 25-13 og 25-21. Brasil hevði í innleiðandi
umfarinum sannførandi vunnið bólk B uttan at tapa eitt einasta sett. Í
fjórðingsfinaluni vann Brasil lættliga 3-0 á Japan, áðrenn tær eisini
vunnu 3-0 á Kina í hálvfinaluni. USA gjørdist nr. 2 í bólki A
í innleiðandi umfarinum. Tær taptu einans fyri Cuba (0-3), men taptu tó
ikki minni enn 9 sett samanlagt í teimun 5 dystunum í bólkaspælinum. Bæði
móti Kina og Póllandi vann USA teprar 3-2 sigrar. Men hetta gav kanska teimum
amerikonsku gott í beinið, tí eisini fjorðingsfinalan móti Italia gjørdist
ein 5-settari, sum USA at enda vann. Í hálvfinaluni møttu tær
aftur Cuba, sum jú hevði vunnið 3-0 á teimum í innleiðandi umfarinum. Men
hesaferð gjørdist úrslitið júst tað øvugta; USA vann 3-0 og spældi seg í
finaluna, har mótsøðuliðið varð Brasil. Brasil hevði aldri áður
verið í Olympisku finaluni, men hevði vunnið bronsu í bæði 1996 og 2000.
USA hevði einaferð roynt seg í finaluni áður; á heimavølli í Los Angeles
1984, har tær máttu lúta fyri Kina. Ein av Kinversku gullvinnarunum ta
ferðina, "Jenny" Ping Lang, er nú venjari hjá
USA. Áðrenn
finaluna leygardagin hevði Brasil ikki tapt eitt tað einasta sett í allari
kappingini, men tey hagtølini broyttust, tá USA vann annað sett 25-18 og
javnaði til 1-1 í settum, eftir at Brasil hevði vunnið tað fyrsta 25-15.
Sostatt
er tað enn bert Japan, sum hevur megnað at farið allan vegin gjøgnum eina
OL kapping uttan at tapa eitt sett. Tað gjørdi Japan í Montreal, Canada
1976. Men gullið hjá Brasil var tó
aldrin í vanda leygardagin, og Brasil vann triðja og fjórða sett 25-13 og
25-21 uttan hóvasták. Bronsudysturin Vertirnir Kina, sum vunnu
gullið í Athen 2004, vunnu í bronsudystinum 3-1 á Cuba, sum vann 3 OL-gull
á rað í 1992, 1996 og 2000. Settúrslitini vóru 25-16, 21-25, 25-13 og
25-20. ------------------------------- Flogbóltur, menn -------------------------------
Finalan Hjá monnunum vóru tað somu
lond sum møttust í finalunu sunnudagin sum hjá kvinnunum leygardagin,
nevniliga Brasil og USA. Men hesaferð gjørdist úrslitið tað øvugta, tí USA
vann mans-finaluna 3-1. Í innleiðandi umfarinum
hevði USA vunnið allar sínar dystir í Bólki A, men í fjorðingsfinaluni var
um reppið at Serbia knógvaði teimum, men USA vann javnbrótaran 15-12 og
spældi seg í hálvfinaluna, har teir møttu Russlandi. Eisini í hálvfinaluni stóð
á, men aftur her vann USA javnbrótaran, hesaferð 15-13, og spældi seg í
finaluna á fyrsta sinni síðani 1988, tá teir vunnu gull fyri aðru ferð á
rað. Eisini Brasil gjørdist nr. 1
í sínum bólki, bólki a, men teir taptu kortini dystin fyri Russlandi 1-3.
Men í fjórðingsfinaluni og
hálvfinaluni hevði Brasil kortini ongar trupuleikar at vinna fyrst á Kina
(3-0) og síðani Italia (3-1). Í finaluni vóru tað eisini
verandi OL-meistararnir, Brasil, sum tóku fyrsta stikkið og vunnu fyrsta
settið 25-20. Men við góðum servum og
smashum vendu amerikanararnir dystinum í ørðum setti og vunnu tað
25-22. Í triðja setti fekk USA
eisini verjuna at rigga, og so var settið teirra; 25-21.
Í fjórða setti fylgdust
liðini til 20-20, men so slapp USA tvey frammum og vann settið 25-23 og
harvið OL-gull. Bronsudysturin Russland, sum tríggjar
ferðir áður hevur vunnið OL gull, vann bronsudystin móti Italia 3-0 við
settúrslitunum 25-22, 25-19 og 25-23. Russland vann eisini bronsuna fyri 4
árum síðani í Athen.
------------------------------- FIVB nýggjan
forseta ------------------------------- Á samkomu í Beijing í gjár
legði FIVB-forsetin Dr. Ruben Acosta Hernandez (úr Mexico) frá sær, eftir
at hava sitið í sessinum síðani 1984, tá hann tók við eftir forsetan síðan
stovnanina í 1947, fransmannin Paul Libaud. 14 lond vóru tá umboðað á
stovnandi fundinum. Hesi 24 árini, Acosta hevur
sitið í forsetasessinum, hevur flogbólturin verið fyri stórari menning
kring heimin, og fær Acosta heiðurin fyri at flogbólturin hevur drigið alt
fleiri áksoðarar til sín, og at sjónvarp og lýsarar hava fingið áhuga fyri
flogbólti. Altjóða flogbóltssamgongan
FIVB er í dag við sínum 220 limalondum (harímillum Føroyar) størsta
ítróttasamgongan í heiminum. Nýggjur forseti í FIVB
verður kinverjin Jizhong Wei, sum frammanundan var varaforseti í FIVB.
Hann hevur áður eisini verið aðalskrivari í kinversku Olympisku nevndini.
Wei fer at sita í forsetasessinum til valið í 2012. Á samkomuni í gjár varð
fráfarandi forsetin Acosta valdur til heiðursforseta fyri
lívið. ------------------------------- Beach Volleyball, kvinnur -------------------------------
Misty
May-Treanor og Kerri Walsh úr USA vunnu hósdagin gull í beach volleyball
kappingni hjá kvinnum. Harvið vardu tær heitið, tær vunnu á OL í Athen
2004. Hetta hevur eingin gjørt áður í heldur stuttu søgunu, sum beach
volley hevur í OL-høpi. Beach volley var fyrstu ferð á skránni í OL í
Atlanta í 1996. May-Treanor
og Walsh, ofta róptar “Queens of the Beach”, vóru seedaðar sum nr. 2, og
møttu í finaluni teimum topp-seedaðu kinversku kvinnunum Jia Tian and Jie
Wang. Í
oysandi regni frammanfyri 12.200 áskoðarum á fullsetta leikvøllinum vann
amerikanska parið dystin 21-18 og 21-18. Hetta
var 69. FIVB-sigurin hjá teimum á rað. Tær seinastu at vinna á amerikanska
parinum vóru júst Tian og Wang, kinverska parið. Hetta hendi seinasta ár í
eini Grand Slam kapping í Noregi. Men hesaferð vóru tað amerikonsku
veteranarnir sum vunnu og tryggjaðu sær gullmerkini. eins og tær gjørdu
fyri 4 árum siðani í Athen. Kastaði
øsku Í
2004 vakti tað ans, tá gullvinnarin Misty May-Treanor kastaði øsku av
mammu síni, sum varð deyð av krabbameini í 2002, á sandin í Athen. Hetta
gjørdi May-Treanor aftur í Beijing hesaferð, tá finaluplássið var tryggjað
við einum sigri á Brasil. Í 2004 segði May-Treanor: "Familjan hjá øllum hinum er her. So hví kann eg ikki hava mína familju við?" Bronsudysturin Bronsumedaljurnar
fóru sama veg sum silvurið, til Kina. Her vunnu Zhang Xi og Xue Chen 21-19
og 21-17 á Talita Antunes og Renata Ribeiro úr
Brasil. Hetta
var fyrstu ferð at Kina yvirhøvur hevur vunnið eina medalju í beach
volley. Hinvegin
er tað eisini fyrstu ferð at Brasil ikki vinnur medalju í beach volley hjá
kvinnum. Í 1996 vann Brasil gull og silvur, í 2000 silvur og bronsu, og í
2004 silvur.
------------------------------- Beach Volleyball, menn -------------------------------
Finalan USA fór eisini avstað við
gullinum hjá monnum. Tað vóru teir báðir Phil Dalhausser og Todd Rogers sum
fríggjadagin vunnu 2-1 í einum sera spennandi finaludysti móti Marcio
Araujo og Fabio úr Brasil. USA
vann við tógvið slit fyrsta settið 23-21. Brasil vann síðani annað sett
21-17. Men í javnbrótaranum var eingin ivi, og USA vann 15-4. Bronsudysturin Bronsudysturin
stóð millum Emanuel Rego og Ricardo Santos úr Brasil og Renato "Geor"
Gomes og Jorge "Gia" Terceiro úr Georgia, sum vunnu OL-gullið í Athen
2004. Men hesaferð noyddust Georgiararnir tómhentir heimaftur, tí
brasilska parið vann dystin 21-15 og 21-10. ---------------------------------
Beach Volleyball – skulu vit
siga strandarflogbóltur? Vit halda okkum til Beach Volley í dag... – var
fyrstu ferð við á Olympisku leikunum í Atlanta í 1996.
Spælið (beach volleyball)
hevur annars sín uppruna í 1920-num á strondunum í Santa Monica í
Kalifornia í USA. Tann fyrsta almenna kappingin við 2-manna liðum var
kortini ikki hildin fyrr enn í 1947. Skjótt komu vinningar uppí
Beach Volley og í dag eru heilt nógvir pengar at vinna hjá bestu
leikarunum. Í fyrstu almennu kappingini
í 1947 var kortini eingin vinningur hjá sigrandi liðnum, men longu árið
eftir vóru vinningar komnir uppí leikin. Tá fekk vinnandi liðið ein kassa
av Pepsi! Í 1972 var á fyrsta sinni
spælt um reiðan pening. 1500 dollarar stóðu uppá spæl. 250 áskoðarar vóru
komnir at hyggja at. Í 1987 varð farið undir
altjóða Beach Volley-kappingar sum FIVB skipaði fyri. Fyrsta "The World
Championship", sum kappingin æt tá, var hildin í Rio de Janeiro í Brasil.
Seinni skifti kappingin navn til "The World Series". Síðani 1996 hevur
altjóða kappingin brúkt heitið "The World Tour". Í 2008 umfatar SWATCH
FIVB Beach Volleyball Tour, sum kappingin eitur við fullum sponsorheiti,
39 kappingar sum verða skipaðar kring allan heimin. Til samans eru 8,3
milliónir dollarar at vinna. Á Olympisku leikunum í
Barcelona í 1992 var Beach Volleyball við sum framsýningar-ítrótt, og árið
eftir avgjørdi altjóða Olympiska nevndin, IOC, at á leikunum í Atlanta í
1996 skuldi Beach Volley vera olympisk ítróttagrein.
Og áhugin vísti seg at verða
sera stórur fyri hesi nýggju OL-greinini, tí útselt var til allar
dystinar. Hesin áhugin var ikki minni
á Bondi-strondini í Australia á OL-leikunum í 2000. 180.000 ákorðarar vóru
til dystirnar, og milliónir fylgdu við í sjónvarpi. Og hesin áhugi bara vaks á
leikunum í Athen í 2004. Og aftur hesaferð, í Beijing, hevur beach volley
verið ein brakandi success. -----------------------------------
Tey sum hava hugt eftir
beach volley í sjónvarpinum, hesar dagarnar OL hevur verið, hava sæð, at
fleiri ferðir hevur verið spælt í oysandi regni; ikki minst í
kvinnufinaluni, men tað var kortini eingin trupulleiki, og dystirnir verða
ikki steðgaðir av teirri orsøk. So folkens, her er eingin
undanførsla hjá okkum í Føroyum. Latið tykkum í svimjiklæðini og gangið so
til strandar oman...
|