Føroyar vunnu greitt á Írlandi

Írland - Føroyar 1-3 (21-25, 12-25, 30-28, 11-25)

Hóast Írland vann eitt spennandi og langt triðja sett 30-28, so var føroyski sigurin ongantíð í vanda. 

Fyrsta sett
Írland fylgdi so dánt við í byrjanini av settinum, men Føroyar vunnu seg so líðandi avgerandi framum og løgdu seg á odda 14-9. Írland bardi seg tó uppaftur á 18-19, men grundað á góðar servur frá Helen á Lakjuni Jaconsen, øktu Føroyar aftur munin til 23-18, áðrenn settið varð vunnið 25-21. 


Annað sett
Hóast Føroyar gjørdu tríggjar servufeilir tíðliga í settinum, so servaðu Helga Guttesen og Helen á Lakjuni Jacobsen tó væl, og eftir lítlari løtu høvdu Føroyar lagt seg framum 13-6.

Hesin munur bara vaks og vaks, og gjørdist 20-10, áðrenn Birita Joensen settið punktum fyri settið, við at vinna settbóltin til 25-12!   


Triðja sett
Í triðja setti tóku tær føroysku sær av løttum fyrstu løtuna, og áðrenn nakar vardi, hevði Írland lagt seg frammum 4-0.

Føroyar tóku time-out fyri at venda gongdini, men lítið hjálpti, tí Írland legði seg á odda 7-0!

Men so servaði Sólvá Dimon aftur nakrar góðar servur, og Føroyar minkaðu um minin til 7-4.

Men tær Írsku treiskaðust, og striltið gekk hjá Føroym at fáa Írland aftur, sum helt sær millum 3 og 5 stig frammanfyri. 

Men so við og við minkaði munurin niður í 2 og eitt stig, og eftir eitt servuumfar hjá Karini Mikkselsen javnaðu Føroyar til 18-18 og løgdu seg siðani framum 19-18.

Men Írland stríddist víðari og javnaði aftur til 22-22, tá Føroyar tóku time-out.

Føroyar vunnu næstu tveir bóltarnar og fingu matchbólt, men írland gav seg ikki og vann seg upp á 25-24 og fekk settbólt. Soleiðis sskiftust liðini um at hava annaðhvørt sett- ella matchbólt, og eftir eina marathon-duell legði Írland seg framum 29-28, áðrenn tær vunnu settið 30-28!


Fjórða sett
Hóast tað kom eitt sindur dátt við hjá Føroyum at skula spæla 4 ístaðin fyri 3 sett, tí Føroyar spæla spæla enn ein dyst í dag, - móti Liktinstein kl. 19:30 - so bilti hetta helst ikki so nógv, tá til stykkis kom, tí lítil dugur var í Írlandi í hesum settinum.

Við eitt gjørdist støðan 9-2 til Føroyar, eftir at Helen á Lakjuni Jacobsen servaði frá støðuni 3-2. Og ikki gekk long tíð, so høvdu Føroyar matchbólt, sum Birgit Guttesen smashaði í gólvið til 25-11!

Kl. 19:30 i kvøld spæla Føoyar móti Liktinstein, sum eisini spælir tveir dystir í dag, tí kl. 13:30 spæla tær móti Luksemborg.

Í 2004 taptu Føroyar 3-2 fyri Liktinstein. (25-27, 21-25, 25-22, 25-19, 11-15).




Dystarskrá:

Fríggjadagur 16. mai 2008:

12,00 Skotland – Luksemborg

15,30 Írland – Liktinstein

18,15 Føroyar – Skotland

Leygardagur 17. mai 2008:

10,00 Írland – Føroyar

13,30 Liktinstein – Luksemborg

16,30 Skotland – Írland

19,30 Føroyar – Liktinsten

Sunnudagur 18. mai 2008:

13,30 Luksemborg – Írland

16,00 Liktinstein – Skotland

19,30 Luksemborg - Føroyar