Ov stuttar móti Liktinstein

Føroyar - Liktinstein 0-3 (22-25, 25-27, 22-25)

Føroyar høvdu Liktinstein á krókinum, men júst tá skrykkjast skuldi í, tá glapp.  Í avgerandi løtum vóru tær føroysku heldur fjálturstungnar, og hetta kostaði at enda ein sigur, sum als ikki tóktiskt ómøguligur. 

Fyrsta sett
Føroyar komu væl frá byrjan, og Helga Guttesen vann okkum fyrstu tveir bóltarnar, og skjótt førdu Føroyar 6-3.

Liktinstein bardi seg tó skjótt upp á 7-7.

Síðani gekk javnt á, har Føroyar stundum vóru 2 frammanfyri, og stundum var javnt.

Men eftir at Føroyar løgdu seg á odda 13-11, kom stígur í eina løtu, og Liktinstein vann tríggjar bóltar á rað og fór fyri fyrstu ferð framum; 14-13. Hesa løtuna hevði haltað við føroysku móttøkunum eina løtu; kanska eisini tí Liktinstein hevði servað væl.

Men tær føroysku bitu tenninar saman og løgdu seg framum aftur 17-14, og tá Helen á Lakjuni Jacobsen smashaði til 20-17, sá væl út.

Men Liktinstein vann teir fyrstu 4 bóltarnar eftir time-outið, og førdi nú 21-20. Og eftir at Annika á Stongum lumpisliga hevði minkað um minun til 22-23 eftir enn eitt time-out, vann Liktinstein næstu tveir bóltarnar, og harvið settið 25-22!


Annað sett
Trupult tóktist vera at fáa veruligt glið á føroyska álopsspælið í øðrum setti, og Liktinstein megnaði at fáa ov nógvar bóltar upp úr gólvinum sum áttu at verið vunnir.

Liktinstein legði seg so líðandi framum 6-3, 8-4 og 9-5.

Men føroyska liðið át spakuliga burturav liktinsteinsku leiðsluni og javnaði síðani til 13-13.

Síðani gekk sera javnt tað sum eftir var av setinum: 14-14, 17-17, 20-20, 22-22, 23-23. 

Við eini hálvari te-skeið meira av ísi í maganum høvdu Føroyar ivaleyst vunnið settið, men í avgerandi løtum sveik sjálvsálitið.

Føroyar høvdu tó settbólt viðstøðuna 24-23, men Esther Biedermann javnaði til 24-24 við einum dundursmashi. Føroyar fingu enn ein settbólt, men enn einaferð var Biedermann teimum føroysku ein herskin biti, tá hon vann bóltin til 25-25.

Matchbóltin, ein serva frá Liktinstein, metti føroyska liðið at fara út og lat hann fara, men hann var kortini innanfyri, og Liktinstein vann settið 27-25!


Triðja sett
Birgit Guttesen kom inn frá byrjan av triðja setti og hon vann báðar teir fyrstu bóltarnar og leðgi Føroyar 2-0 framum.

Men Liktinstein javnaði til 4-4 og fór framun 8-4. Serliga Julia Fehr var trupul at fáa bilbugt við.

Hesa løtuna fekk Liktinstein alt uppaftur av gólvinum.

Men hóst Liktinstein fór upp á 10-6, 13-10, 14-11, 16-13 og 19-16, so góvu Føroyar tó aldrin skarvin yvir og javnaðu ístaðin til 20-20. Nógvar av føroysku bóltunum hevði Sólvá Dimon og Karin Mikkelsen vunnið.

Men í avgerandi løtunum sviku føroysku servurnar, og eftir at støðan hevði verið bæði 21-21 og 22-22, lobbaði Juila Fehr fyri 17. ferð til støðuna 24-22 til Liktinstein og matchbólt. Og hann lobbaði Julia fyri 18. ferð í føroyska gólvið til 25-22 sigur til Liktinstein í triðja settinum.

Sunnudagin kl. 19:30 spæla Føroyar móti Luksemborg, sum fyrr um dagin eisini skal spæla móti Írlandi.

Í 2004 taptu Føroyar 3-2 fyri Luksemborg (24-26, 25-23, 27-25, 24-26, 11-15).


Dystarskrá:

Fríggjadagur 16. mai 2008:

12,00 Skotland – Luksemborg

15,30 Írland – Liktinstein

18,15 Føroyar – Skotland

Leygardagur 17. mai 2008:

10,00 Írland – Føroyar

13,30 Liktinstein – Luksemborg

16,30 Skotland – Írland

19,30 Føroyar – Liktinsten

Sunnudagur 18. mai 2008:

13,30 Luksemborg – Írland

16,00 Liktinstein – Skotland

19,30 Luksemborg - Føroyar