C-EM-undankapping í Føroyum

- Jákup á Stongum -

Føroyar - Liktinstein 3-1

Settúrslit: 22-25, 25-27 og 23-25

Okkara raktu ikki dagin. Í einum tøttum dysti, er ikki ráð til feilir. Í avgerðandi løtum vóru royndirnar ov lítlar.

Vit komu tó væl frá byrjan og lógu omaná við tveimum til 16-14, tá øktist til trý stig á muni. Hesa løtuna spældu vit væl og virðiliga upp til Liktinstein, væl varð sligið frá báðum liðunum, okkara miða við Sólgerð og Helen var betur við enn teirra og gav tað okkum lítlan fyrimun. 20-17 Okkara blokkur var væl við, men her hevði Liktinstein munin 20-20. Nú sá vitjandi liðið møguleikan og undir ágangandi álopsspæli, bognaðu okkara enn einaferð í endaspurtinum 22-25

Næsta settið kom Liktinstein betur frá byrjan og lógu omaná við tveimum. Við tógvi stríð hála vit okkum upp á javnt 13-13 so dragnar aftur við tveimum 14-16. Enn einaferð upp á javnt og enntá frammanfyri við einum 18-17. Men hendan løtan er kostnaðarmikil í servufeilum. Samanlagt fýra mestsum á rað, tað er baks omaná baks í mótbrekku. Í álopspartinum fekk Karin tað mesta. Kanska í meira lagi. Við konsekvent tveimum hávaksnum í mótblokki, var trupult at sláa vinnarasløg. Tí varð mangur bóltur drúgvur og tað krevur megi. Nakað varð enn heva á miðju, men í dag var lítið at síggja til vinnarasløg frá diagonalinum. Sólvá slóg væl tá ið hon fekk møguleikan, hennara mótblokkur var til at tosa við?

Enn einaferð missa vit stevið tá Liktinstein stramma í. Frá javnleiki 20-20 fylgjast liðini við einum stigi upp til endabrest. Vit fáa tveir settbóltar, eru frammafyri bæði 24-23 og 25-24, men tapa settið 25-27.

Vit eru skjótt afturút við 4-8 í triðja setti. Tykist sum okkara hava givið skarvin yvir og frástøðan økist. Tá svartast sær út, tekur áskoðarafjødin um endan, og við góðum stuðli megnar liðið enn einaferð at skapa spenning um úrslitið. Tað skerst tó ikki burtur at fjáltur varð á, og vit í løtum stóðu illa á vøllinum, við feilum sum úrslitið . Ikki so nógvum, men nokk til at eisini at tapa triðja sett 22-25. Forrestin! Annika stóð væl í blokkinum, ikki sørt undarligt at síggja Liktinstein avgera dystin við tveimum lobbum yvir okkara minsta leikara.

Kanska krevja vit í meira lagi frá okkara ungu leikarum. Liktinstein er eitt sera vælleikandi flogbóltslið í munandi betur dystarvenjing. Feilir eru rárari hending. Sama ger seg galdandi fyri Luxemborg, okkara mótstøðulið sunnukvøldið kl. 19.30. Nakað betur kunnu vit gera tað og Luxemborgski sigurin á Liktinstein varð ikki tað sannførandi. Livst so spyrst!


Dystarskrá:

Fríggjadagur 16. mai 2008:

12,00 Skotland – Luksemborg

15,30 Írland – Liktinstein

18,15 Føroyar – Skotland

Leygardagur 17. mai 2008:

10,00 Írland – Føroyar

13,30 Liktinstein – Luksemborg

16,30 Skotland – Írland

19,30 Føroyar – Liktinsten

Sunnudagur 18. mai 2008:

13,30 Luksemborg – Írland

16,00 Liktinstein – Skotland

19,30 Luksemborg - Føroyar