Fjórðu steypafinalurnar, 2003: Kvinnur: TB - ÍF 3-1 | Menn: ÍF - SÍ 3-2 Taraflex gólv Fyrstu árini hevði verið leikt á vanliga gólvinum í ítróttahøllini, sum hevur strikur til einar 135 ymsar ítróttargreinir so sum handbólt, badminton, tennis, trampolinhopp, kurvabólt o.s.fr. umframt flogbólt, og tí kundi mangan vera trupult hjá áskoðarum at síggja um bóltar vóru innanfyri ella uttanfyri strikurnar. Men til finalurnar í 2003 hevði FBF leigað Taraflex-gólvið hjá danska flogbóltssambandimum. Tí vóru bert strikur til flogbólt á vøllinum. Hetta gav sera flottar myndir í sjónvarpinum. Síðani 2003 hava allar finalurnar verið spældar á tílíkum undirlagi. Í 2005 keypti FBF sær sítt egna gólv, sum verður brúkt til serlig høvi. Kvinnur: TB, sum hevði vunnið á Mjølni árið fyri, var aftur í finaluni hetta árið. Her skuldu tær møta ÍF, sum fyri fyrstu ferð var í kvinnufinaluni. Hetta var enn ein kvinnufinala, sum skuldi vísa seg at gerast sera spennandi, hóast TB sannførandi vann fyrsta settið 25-17. Í øðrum setti varð neyðugt við eykabólti, áðrenn ÍF vann 26-24. ÍF ætlaði sær eisini triðja sett og førdi skjótt 10-3. Men sperðil kom í aftur hjá ÍF, og TB javnaði til 13-13. ÍF fylgdi tó við restina av settinum, men megnaði ikki at gera sær dælt, tá tær fingu settbólt. Ístaðin vann TB 27-25. Í fjórða setti var lítið veiggj eftir í ÍF, og TB vann 25-20 og steypafinaluna annað árið á rað. Menn: Í mansfinaluni vóru somu liðini í finaluni, sum árið fyri, SÍ og ÍF. Í sera spennandi 5-settaranum knógvaði ÍF at enda SÍ 15-13 í 5. setti. Liðini høvdu skifts gjøgnum allan dystin at vera omaná. Fyrsta settið vann ÍF rímiliga lætt 25-21. Síðani átti SÍ tørn og vann 25-23. So skifti aftur og ÍF vann 25-16, men SÍ kom fyri seg aftur og javnaði til 2-2 í settum við at vinna fjórða settið 25-21. Í fimta setinum var SÍ á odda 12-9. Men so kom steðgur í spælið eina góða løtu, tá Kenneth Neshamar hjá ÍF kokti fótin. SÍ kom ikki veruliga í gongd aftur, og ÍF tók seg framum og vann settið 15-13, og gjørdist harvið steypavinnari á øðrum sinni.

Fimtu steypafinalurnar, 2004: Kvinnur: TB - Dráttur 3-1 | Menn: ÍF - SÍ 3-0 Kvinnur: Triðju ferð á rað hevði TB spælt seg í kvinnufinaluna. Hinumegin netið stóð Dráttur, sum gjørdi sína triðju roynd í finaluni, men fyri triðju ferð fór Dráttur aftur vestur í Vágar sum av torvheiðum, tí tað var TB sum vann sín triðja steypafinalusigur á rað og harvið steypið til ognar.  TB legði fyri sum eitt óløgi og vann 25-11 í fyrsta setti. Tó at Dráttur við Nicolinu Alter á odda vann annað sett 25-20, so gjørdist finalan ongantíð veruliga spennandi, tí TB vann sannførandi tey bæði næstu settini, 25-16 og 25-19. Menn: Triðju ferð á rað stóð mansfinal millum SÍ og ÍF. Hjá ÍF var hetta teirra fjórða steypafinala upp í slag. Spenningur kom ongantíð í dystin, tí ÍF vísti eina sanna maktdemonstratión og vann 25-17, 25-22 og 25-20.

Sættu steypafinalurnar, 2005: Kvinnur: Mjølnir - TB 3-1 | Menn: SÍ - Mjølnir 3-0 Kvinnur: TB var nú vorðin fastur gestur í kvinnufinaluni. Hesaferð var mótstøðu-liðið Mjølnir, sum í 2002 hevði tapt finaluna fyri júst TB. Hetta tapið fekk Mjølnir hevnt, tí hesaferð vunnu Klaksvíkskvinnur 3-1. Hetta var ein av teimum minni spennandi kvinnufinalunum. Mjølnir hevði ikki fyri neyðini at kýta seg fyri at vinna tey bæði fyrstu settini 25-20 og 25-21, og hóast TB vann triðja sett so mikið sum 25-13, so var ongantíð ivi um, hvat var betra liðið, og tá Marjun Kalsø hevði vunnið seinasta bóltin í fjórða setti, sum endaði 25-19, kundi hon fyri triðju ferð fyri Mjølnir taka móti steypinum. Menn: Menninir hjá SÍ vóru í síni fjórðu finalu á rað. Hinumegin netið stóð Mjølnir, sum ikki hevði verið í finaluni síðani 2001. Lítil og eingin spenningur var í dystinum. SÍ vann uttan himpr tvær ferðir 25-18 í teimum báðum fyrstu settunum. Bert eina ferð í dystinum treiskaðust teir í Mjølni og vunnu seg upp á 23-21 í triðja setti, men SÍ vann kortini teir næstu fýra bóltarnar og harvið settið 25-23 og dystin 3-0.

Sjeyndu steypafinalurnar, 2006: Kvinnur: TB - ÍF 3-1 | Menn: Mjølnir - Fleyr 3-0 Kvinnur: Fyri fimtu ferð á rað var TB í kvinnufinaluni. Og júst sum í 2003 skuldu TB takast við ÍF. Og úrslitið gjørdist eisini tað sama: 3-1 til TB. Fyrsta settið var eitt rættiligt marathon-sett, sum TB vann 32-30 – hægsta stigatal nakrantíð í steypafinalunum! Í øðrum setti vann TB seg skjótt avgerandi framum og vann settið 25-19. ÍF beyt meira frá sær í triðja setti og vann 25-23, men spenningur kom kortini ikki í dystin, tí TB vísti onga náði í fjórða setti, sum endaði 25-16. Og so hevði TB vunnið sín fjórða steypasigur í 5 ár. Menn: Mansfinalan var góði gamli klassikarin millum Fleyr og Mjølnir. Hetta vóru eisini liðini, sum brustu saman í fyrstu steypafinaluni í 2000. Tá var Fleyr mettur sum favorittur at vinna finaluna, men Mjølnir vildi tað øðrvísi. Aftur í 2006 mettu tey kønu, at handverkið hjá rutineraðu Fleyr leikarunum skuldi fáa steypið í hús, men júst sum í 2000, var tað Mjølnir sum tók tey kønu - og Fleyr - á bóli, og vann ein tryggan 3-0 sigur. Tað tók bert ein tíma og 20 minuttir at vinna 25-22, 26-24 og 25-23, og so slapp Mjølnir fyri aðru ferð at lyfta steypin frammanfyri teimum nipnu arvafíggindunum úr Fleyr.

Áttandu steypafinalurnar, 2007: Kvinnur: Dráttur - KÍF 3-2 | Menn: Mjølnir - ÍF 3-0 Kvinnur: Í síni fjórðu roynd eydnaðist endiliga Drátti at vinna steypafinaluna, men tað var um eitt hár gjørt, at tað ikki ístaðin gjørdist KÍF, sum fór við sigrinum í eini tí mest minniligu steypafinaluni, sum spæld er. KÍF tók fyrsta settið og Dráttur annað. – Bæði endaðu 25-19. Eisini triðja sett endaði 25-19; tað vann KÍF. Í fjórða settið gekk alt galið hjá KÍF, og Dráttur vann 25-8. Hetta er størsti munur, sum hevur verið í nøkrum setti í eini steypafinalu. Í fimta settinum vann Dráttur seg avgerandi framum, og hóast KÍF kom sterkt móti endanum, so vann Dráttur 15-13 og kundi endiliga kalla seg steypavinnara í síni fjórðu roynd síðani ár 2000. Menn: Mjølnir var aftur í mansfinaluni – triðja árið á rað. Enn einaferð høvdu "tey kønu" gjørt mótstøðuliðið ÍF til favoritt, men enn einafeð vóru "tey kønu" farin skeiv, tí Mjølnir snøgt sagt vant burturúr ÍF henda dagin í einari finalu, sum bert vardi í ein tíma og 16 minuttir.  Mjølnir vann settini so greitt sum 25-16,  25-21 og 25-15!

Níggjundu steypafinalurnar, 2008: Kvinnur: ÍF - SÍ 3-0 | Menn: SÍ - Mjølnir 3-1 Kvinnur: Eitt var vist frammanundan finaluni, og tað var, at vit fóru at fáa ein nýggjan steypavinnara hetta árið, tí hvørki ÍF ella SÍ høvdu nakrantíð vunnið steypafinaluna áður. Hetta var triðja royndin hjá ÍF, sum bæði í 2003 og 2005 hevði tapt fyri TB. SÍ var í síni fyrstu finalu. "Køn", sum ikki altíð eru so køn, tá til stykkis kemur, høvdu sett favorittheitið á SÍ. Men hesum gjørdi ÍF fullkomiliga til skammar og vann sera sannførandi 3-0 í helst mest ójøvnu kvinnufinaluni sum higaril er spæld. Hjá SÍ riggaði snøgt sagt einki hendan dagin.  Settúrslitini vóru so mikið greið sum 25-12, 25-17 og 25-21. Menn: Í mansfinaluni var Mjølnir fjórða árið á rað í finaluni, og tvær tær seinastu hevði Mjølnir vunnið. Hesaferð var mótstøðuliðið SÍ, júst sum í 2005. Tá vann SÍ, og tað gjørdi SÍ eisini hesaferð. Hóast Mjølnir legði seg á odda tíðliga í fyrsta setti, so vóru teir at enda knógvaðir 26-24. Í øðrum setti fór SÍ skjótt langt framum, og Mjølnir spardi tí uppá krútið og lat SÍ vinna settið 25-13. Í triðja settinum hevði Mjølnir latið krútgoymsluna uppaftur, og skjótt bumbaðu teir settið heim, sum endaði 25-18. Í fjórða setti var rættiligur spenningur. Mjølnir vann seg upp á 16-13, men SÍ bardi seg uppaftur á javnt. Síðani var púra javnt fram til 24-24. Tá vann SÍ tveir bóltar og harvið steypafinaluna 2008. Tíggjundu steypafinalurnar, 2009: Kvinnur: SÍ - Fleyr 3-1 | Menn: ÍF - SÍ 3-1 Kvinnur: Eftir miseydnaða finalu-ævintýrið árið fyri, har sørvágskvinnur ikki fingu ein fót fyri seg av berum nervum, høvdu tær nú tikið annað skinn um bak og løgdu skjótt sjógv ímillum seg og Fleyr, sum var í síni fyrstu finalu. Munurin vaks skjótt upp í 9 stig, og hóast Fleyr menti seg móti endanum av settinum, so vann SÍ settið 25-19 uttan hóvasták. Men góða gongdin hjá Fleyr móti endanum av fyrsta setti helt fram fyrstu løtuna av øðrum setti, sum Fleyr førdi. Men brádliga kom kinkur í spælið hjá Fleyr, og hesum gjørdi SÍ sær skjótt dælt av og legði seg framum aftur og vann settið 25-21. Eftir at hava verið aftanfyri við trimum stigum tíðliga í triðja setti, bardi Fleyr seg upp á javnt aftur og fór tvey stig framum miðskeiðis í  settinum. Henda fjarstøða minkaði ongantíð aftur, og Fleyr vann settið 25-22 og dysturin var aftur púra opin. Fjórða sett mundi ongan enda fingið. Eftir at hava SÍ hevði verið frammanfyri við 5 stigum tíðliga í settinum, javnaði Fleyr aftur miðskeiðis í settinum. Soleiðis fylgdust liðini tað sum eftir var av settinum. SÍ hevði dystarbólt við støðuna 24-23, men Fleyr yvirlivdi. Soleiðis helt settið fram góða løtu, men eftir at hava staðið ímóti einum trimum dystarbóltum aftrat, tók SÍ av tilboðnum tá tær aftur høvdu dystarbólt við støðuna 29-28 og vunnu sostatt settið 30-28 og sítt fyrsta steypaheiti. Menn: Fyri fjórðu ferð síðani 2002 møttust ÍF og SÍ í mansfinaluni. SÍ hevði vunnið fyrstu uppgerðina teirra millum í 2002, men í 2003 og 2004 hevði ÍF verið omaná. Í fyrsta setti leikaði leingi javnt á, men móti endanum streyk ÍF nøkur avgerandi stig framum og vann settið 25-22. Í øðrum setti var SÍ omaná alt settið og vann 25-22.  Men tann spennandin finalan, sum tey bæði fyrstu settini løgdu upp til, kom tó ongantíð rættiliga, tí í triðja og fjórða setti var ÍF nógv tað betra liðið. Serliga Boban Ilic og Rúni Weihe hjá ÍF voldu sørvingum strórar trupulleikar og vóru ikki til at steðga. ÍF vann settini 25-17 og 25-19.  Steypasigurin var tann fjórði í røðini hjá ÍF.

[ tíðindasavnið ] [ til forsíðuna ]