Í mun til undanfarin ár er munurin tó bert tann, at í ár er hesin ein føroyingur. Jan Henttze gjørdist seinasta ár sum fyrsti føroyingur altjóða flogbólsdómari, og tí hevur Flogbóltssambandið avgjørt at geva Jan Hentze møguleikan í ár til hesa heiðurligu uppgávu.

Jan Hentze er 38 ára gamal, men hevur seinastu tíðina havt eina flúgvandi byrjan sum altjóða flogbóltsdómari. Hann fekk útbúgving sum divisiónsdómari í Danmark í 2003, og longu í juli 2004 eydnaðist tað honum at koma til Pólands á altjóða dómaraskeið, sum varð fyriskipað av altjóða flogbóltssambandinum FIVB.

Og longu í desember 2004 vóru boð eftir Jan Hentze um at koma at døma ein altjóða dyst í Hollandi í kappingini í Top-Teams Cup. Og Jan Hentze megnaði uppgávuna til fullnar.

Í januar 2005 var hann aftur uttanlands í dómaraørindum. Hesaferð í Noregi, har uppgávan var, saman við trimum øðrum dómarum, at leiða ein innleiðandi bólk um evropeiska meistaraheitið fyri unglingar.

Næsta uppgáva hansara verður sostatt steypafinalan leygardagin á Hálsi, har hann skal vera 1.-dómari í báðum finalunum.

Tað verður Tummas Óli Mortensen sum verður 2.-dómari í bæði kvinnu- og mansfinaluni.

Tummas Óli hevur dømt í fleiri ár, og hevur eisini sum einasti føroyingur saman við Jan Hentze danska divisónsdómaraútbúgvingina. Undanfarin ár hevur hann eisini verið 2.-dómari í fleiri finalum saman við teimum altjóða dómarunum, sum hava vitja í sambandi við steypafinalurnar.