Eftir 3-1 sigurin á Skotlandi í gjár, er dysturin hjá kvinnulandsliðnum móti Liktinstein í dag ein rættulig finala - vinnarin kemur til endaumfarið í Luxembourg í 2011.

Nógv stóð á føroyska liðnum í 4. setti í gjár móti Skotlandi, tá føroyska liðið var aftanfyri 24-21, og Skotland hevði havt settbólt.

Og tað gjørdist ikki minni spennandi, at tað skuldi verða Karina Poulsdóttir Debes, sum skuldi serva, tí servurnar hava higartil ikki rættuliga verið hennara sterkasta síða - men øllum hesum vísti Karina
aftur, hóast at tey flestu sótu og hugdu burtur, tá hon fór fram at serva! Hon sendi tríggjar servir á rað djúpt aftur í 1-ara hornið - júst sum tað var lagt upp til í taktikkinum - og hetta var við til at bjarga liðnum undan einum tapi. Gleðin stálaði út av henni, tá dysturin var liðugur.

Men tað var eisini ein annar leikari, sum fekk avgerandi leiklut. Júst um somu tíð var hevarin Rakul Dalsgarð Jakobsen innskift fyri Einu Stephaniu Kalsø, sum annars hevði spælt ein megnar dyst, men Rakul var eisini við til at steðga gongdini hjá Skotlandi, soleiðis at
Føroyar kundu vinna dystin 3-1, og sostatt framvegis hava
vónir um at røkka 2.-plássinum, sum gevur víðari atgongd í kappingini.

Annars var tað stuttligt at síggja, at teir ungu leikararnir á liðnum ikki smæðast burtur.  Bert 17-ára gomlu Sofía Purkhús og Anja Sonnadóttir
Danielsen og 18-ára gamla Eina Kalsø leiktu ein sera góðan dyst.

Gudrid Nolsøe, sum var í byrjunaruppstillingini í fyrsta dystinum, kom eisini væl inn í dystin í gjár, og so má ein ikki gloyma liðskiparan Karin Mikkelsen, sum við síni stríðssál og vinnaravilja bardist fyri at fáa ein sigur heim.

Liberoin Margit G. Joensen hevði eisini góðar móttøkur, men taktikkurin hjá Skotlandi var í gjár at serva á áleypararnar, so hon slapp ikki rættuliga at royna.

Á diagonalinum hevði Birgit Guttesen ein góða byrjan í dystinum, og gjørdi nøkur frálík "kross-álop", men tað eydnaðist henni ikki
rættuliga at fáa back-spikin at rigga í gjár. 

Annars kann sigast um føroyska liðið, at tað samanumtikið leikti ein góðan dyst, men framvegis er tað ymist, sum skal betrast til dystin í dag. Serliga eru tað smáfeilir, sum framvegis kosta liðnum stig, og
tí verður stórt fokus sett á hetta undan dystinum í dag.

Dysturin í dag verður klokkan 16,00 og verður sendur beinleiðis í Kringvarpinum. Frásøgumaður er Leivur Fredriksen. og viðmerkjari er Hans Fróði Jensen.

Morgunmynd úr Liktinstein av føroyska liðnum

Undan dystinum
Føroyar - Liktinstein

Hetta kann koma at verða ein smeitur fyri liðið, men venjarin Kristian Mikkelsen sigur, at hann hevur onkrar loysnir.

 
Helga Guttesen

Á bonkinum við byrjan eru: Rakul Dalsgarð Jakobsen, hevari - Gudrid Nolsøe, kantur - Sofía Purkhús, kantur - Helga Guttesen, diagonalur - Katrin Petersen, miðja.