Til øll feløgini!

Tórshavn 2. september í 2009

Kunningarskriv

Kappingarárið í flogbólti nærkast nú av álvara, og nevndin í FBF fyrireikar. Í hesum sambandinum skulu vit kunna tykkum um ymiskt.

Ungdómskapping hjá TB og venjarafundur

Í sambandi við ungdómskappingina, sum TB skipar fyri 26. september, verða allir ungómsvenjarar kallaðir til fundar har suðuri. Á skránni tá eru allar venjingarnar í vetur – tað skrivið, sum Rosa Jacobsen hevur sent tykkum. Her skal verða umrøtt, hvussu venjingarnar verða skipaðar, hvørjir ábyrgdarpersónar eru osfr. Tað er tí ógvuliga avgerandi, at tit senda venjarar suður henda dagin.

Landskappingin hjá teimum ungu

Tey 10 og 12 ára gomlu og unglingar spæla steypakappingar, sum feløgini skipa fyri eftir gomlu skipanin. FM verður skipað í Havn. Nevndin heitir á feløgini at skipa fyri kappingum fyri hesum aldursbólkinum, so at tey fáa fleiri dystir. Vit skulu avtala nærri, tá ið landskappingin er løgd, nær og hvar hesar smákappingar kunnu verða skipaðar, men tit skulu vera væl komin at siga frá, um tit hava áhuga, og nær tað liggur fyri.

Tey 14 ára gomlu spæla landskapping. Landskappingin verður skipað sum heima og útidystir. Nr. 1 og 2 spæla finalu í Trongisvági síðst í kappingarárinum saman við unglingunum.

Tey 10 ára gomlu spæla steypakappingar og FM eftir Kidsvolleysipanini.

Skeið í Kidsvolley

Skeið verður skipað 19. september kl. 1300-16.00 í Hoyvíkshøllini. Ætlanin við skeiðnum er at uppfríska Kidsvolleyskipanina og skapa eina felags fatan av, hvussu vit spæla og skipa kappingarnar. Seinasta freist at tekna seg til skeiðið er mikudagin 16. september á ___       fbf(kurla)fbf.fo . Heitt verður á øll feløgini at senda umboð til skeiðið.

Eik-ligan

3. oktober er Fleyrkappingin. Fyrsta leikumfar í Eik-liguni verður 10. oktober.

Eik-ligan verður umskipað hetta kappingarárið. Liðini í Eik-liguni hjá monnum spæla tríggjar heima- og útidystir ímóti hvørjum øðrum. Nr. 1 og 2 spæla FM-finalu. Best av trimum dystum.

Kvinnurnar spæla hálvtannað umfar, so sum kappingarárið 2008/09. Nr. 1 og 2 spæla FM-finalu. Best av trimum dystum.

Ætlandi verða tveir teir fyrstu finaludystirnir hjá monnum og kvinnum leiktir á uttanveltaðum vølli. Er neyðugt við eini triðju finalu, verður hon á heimavøllinum hjá tí liðnum, sum var nr. 1 eftir innleiðandi umførini.

Liðini, sum koma í steypafinaluna í 2010, skulu hava hvør sín lit á leikbúnanum. Sama er galdandi fyri finaludystirnar í Eik-liguni. Óheft lutakast verður ímillum liðini, sum kvalifisera seg til steypafinaluna og FM-finaluna, um hvat lið hevur heimavøll og tí kann gera av sín lit.

Frá kappingarárinum 2010/11 skulu øll feløg í Eik-liguni hava úti- og heimabúnar.

Vinaliga

Nevndin í FBF

Magnus Tausen - formaður