Føroyska kvinnulandsliðið í flogbólti fer í dag til Liktinstein, har liðið fer at spæla við í kappingini um evropeiska meistaraheitið.

Kappingin í Liktenstein er ein undankapping, sum allar smátjóðir í Evropa taka lut í.

Í bólkinum hjá Føroyum eru Kýpros, Skotland og Liktinstein.

Fyrsti dysturin verður fríggjdagin 4. juni ímóti Kýpros, og leygardagin 5. juni verður spælt ímóti Skotlandi. Seinasti dysturin verður ímóti Liktinstein sunnudagin
6. Juni.

Liðið verður aftur í Føroyum mánadagin 7. juni.


Beinleiðis í útvarpi Kringvarpsins
Kringvarpið ferð at siga beinleiðis frá øllum dystunum, og fyrsta frásøgnin verður fríggjadagin kl. 18,10. Tað er Leivur Fredriksen, sum fer at siga frá.

Føroya hava áður leikt ímóti øllum hesum liðunum, og tá EM-kappingin var í Føroyum í mai 2008 vann Føroyska liðið 3-1 á Skotlandi (21-25, 25-19, 25-20, 25-18), men tapti fyri Liktinstein 3-0 (22-25, 25-27, 22-25).

Nyggir leikarar
Føroyska kvinnulandsliði - sum seinastu Oyggjaleikirnar vann Gull á Álandi - eftir eina sera spennandi finalu ímóti Saarema, - hevur í hesi kapping nakrar nýggjar
leikarar við á liðnum.

Hevarin frá seinast - Annika á Stongum - er ikki við vegna skúlagongd, og tí verður spennandi at vita, hvør verður tann sum skal avloysa hana á hevaraplássinum. Ein av miðáleypararunum er heldur ikki við; tað er Hjørdis Johannesen, sum er givin.

Á liberoplássinum er Margit G. Joensen við aftur, og á Oyggjaleikunum var tað Gurðið Syderbø, sum leikti nakrar branddystir.

Av áleyparunum eru Sólva Dimon og Helen á Lakjuni ikki við í ár.

Av nýggjum leikarum kunnu nevnast Karina Debes, Fleyr, sum er komin inn á miðjuna at leika, og nýggir hevarar eru Eina S. Kalsø, Mjølnir, og Rakul Dalsgarð Jakobsen,
Fleyr, sum skulu royna seg fyri fyrstu ferð, eins og Gudrid Nolsøe, TB, er við aftur á liðnum.

Nýggjur kantleikari er unga Sofía Purkhús, Mjølnir, sum millum annað eisini er kend frá føroyska fótbóltslandsliðnum.

Kýpros í serflokki
Av teimum liðunum, sum Føroyar skulu leika ímóti, verður mett, at Kýpros er nógv tað sterkasta liðið, og hevur hetta liðið vunnið kappingina næstan øll árini, so tað verður ein stór mótstøða, sum føroyska liðið fær í fyrsta dystinum. Hesin dysturin verður kl. 18,00 føroyska tíð fríggjadagin.

Hinir dystirnir verða leiktir soleiðis:
Leygardagin kl. 14,00 móti Skotlandi, beinleiðis frásøgn í  Kringvarpinum.

Sunnudagin kl. 16,00 ímóti Liktenstein, beinleiðis frásøgn í Kringvarpinum.

Føroyski venjarin Kristian Mikkelsen metir, at føroyska liðið er væl fyri. Samanlíknað við Oyggjaleikirnar sigur hann, at nakrar útskiftingar eru á liðnum, og ungu leikararnir eru vornir eitt ár eldri, og spennandi verður eisini at vita, hvussu nýggju hevararnir koma at klára seg í síni fyrstu stóru altjóða kappingini.

Nr. 1 og 2 í kappingini leika seg víðari í eitt endaumfarð, sum verður í Luxembourg í 2011.

Eik Banki er høvuðsstuðul og Atlantic Airways er hjástuðul hjá liðnum.

Fremst frá vinstru: Rakul Dalsgaard Jakobsen, Fleyr; Katrin Petersen, TB; Margit Gaard Joensen, Mjølnir; Eina Stephania Kalsø, Mjølnir; Karin Mikkelsen, SÍ.

Aftast frá vinstru: Birgit Guttesen, Mjølnir; Birita Joensen, Fleyr; Anja Sonnedóttir Danielsen, Fleyr; Karina Poulsdóttir Debes, Fleyr; Sofía Purkhús, Mjølnir; Gudrid Nolsøe, TB; Helga Guttesen, SÍ.